Dorëzimi i mandatit të Saimir Tahirit ditën e sotme ka bërë bujë në të gjithë mediat e huaja. Një lajm i Associated Press ka qarkulluar në mediat ndërkombëtare, përfshirë dhe Washington Post.

“Ish-ministri i Brendshëm i Shqipërisë, ka dhënë dorëheqje si deputet për të lejuar hetuesit që të provojnë përfshirjen e tij në një rrjet të trafikimit të drogës. Saimir Tahiri tha të enjten se heq dorë nga ky post në mënyrë që hetimi të mos ndikojë në rrugën e integrimit të Shqipërisë drejt Bashkimit Europian”, thuhet ndër të tjera në lajm.

Më tej në artikull është shkruar dhe një historik i shkurtër i angazhimit të Tahirit në politikë.

“Tahiri, që ka shërbyer si ministër i Brendshëm nën qeverinë socialiste nga viti 2013 deri në vitin 2017, akuzohet për lidhje të dyshuara me një grup të dyshuar për trafikimin e sasive të mëdha të drogës. Disa nga krerët e grupit janë arrestuar në Shqipëri dhe Itali. Tahiri ka mohuar lidhjet me grupin”, thuhet më tej në shkrim.

Në artikullin e Associated Press, ripublikuar nga mediat ndërkombëtare, përmendet fakti që në 2017-n parlamenti i hoqi imunitetin Tahirit, që në këtë mënyrë prokuroria të kontrollonte banesën e tij.

“Shqipëria pret që Këshilli Europian të miratojë nisjen e bisedimeve të anëtarësimit në qershor”, mbyllet artikulli.