Sekretari Organizativ në PD Eno Bozdo, ka deklaruar se protesta e 26-majit do të jetë më e madhja që ka organizuar ndonjëherë opozita.

Bozdo tha se vendi është para një situate të rrezikshme pasi mazhoranca është e përfshirë në krim dhe për këtë duhet reagim i fortë qytetar për të ndryshuar gjendjen e krijuar.

I pyetur nëse PD kishte materiale të tjera implikuese për zyrtarët e mazhorancës, ai deklaroi se ky diskutim nuk ka ndonjë farë rëndësie, por PD si institucion publik komunikon me qytetarët dhe u paraqet atyre të vërtetën, duke shtuar se nuk merr rolin e gjyqësorit siç bën kryeministri Rama.

Referuar protestës së 26-majit, Eno Bozdo deklaroi se do të jetë paqësore dhe madhështore, duke ftuar qytetarët që të dalin familjarisht.

“Partia Demokratike është institucion publik dhe ka detyrën e saj të tregojë të vërtetën para shqiptarëve dhe nuk merr rolin e gjyqësorit siç bën Rama. PD komunikon me shqiptarët.

Përgjegjësi për këtë situatë mban Edi Rama, ne nuk mund të bëjmë sikur nuk ka ndodhur asgjë, opozita duhet të bllokojë jo parlamentin por të gjithë institucionet, shqiptarët ti bashkëngjiten opozitës se është detyrim qytetar për fëmijët tanë. Si ka mundësi që dy ministra të Brendshëm të kapur të lidhur me krimin?!

Do të jetë protesta më madhe që opozita ka organizuar në Shqipëri, prezenca e qytetarëve është shumë e rëndësishme pasi është një protestë për ta, unë do të jem me familjen time”, deklaroi Bozdo.

Sa i përket zërave se do të ketë dhunë, ai deklaroi se sa herë që PD organizon protestë ka lajmëtar të tillë, të cilët i konsideroi ‘urithë’, që përhapin frikë, duke shtuar se një gjë e tillë nuk do të ndodhë.

“Nuk vazhdohet më kështu, duhet reagim. Do të jetë paqësore dhe qytetare, në zakonin e PD-së. Sa herë që PD organizon protestë ka disa lajmëtarë, që unë u them ‘urithë’ që paralajmërojnë dhunë, por nuk do të ketë” u shpreh Eno Bozdo.

Sekretari Organizativ i PD-së u shpreh se protesta e opozitës nuk e dëmton Shqipërinë sa i përket integrimit, duke kujtuar se PD është e vetmja shpresë për shqiptarët për tu integruar në Europë.

“Çohuni të gjithë, vendi është në rrezik, mund të duket emocionale por vendi vërtetë është në rrezik. Perspektivën europiane nuk e përcakton një protestë e opozitës, është qeveria me punën e saj që  e përcakton. PD është e vetmja shpresë e shqiptarëve pët tu integruar në BE, siç ka qenë dhe më parë”, theksoi Eno Bozdo.