Ndeshja e quajtur “miqësore” midis U-23 të Malajzisë dhe Emirateve të Bashkuara Arabe u shndërrua në një betejë armiqësore, ku në vend të futbollit u shkëmbyen grushta dhe shkelma.

Të rinjtë nga Malajzia po udhëhiqnin 2-0 kur lojtarët e Emirateve, dukshëm të acaruar nga fakti që po humbisnin, nisën të bënin disa ndërhyrje të rënda. Gjyqtari i takimit nuk arriti të rikthente qetësinë në lojë dhe menjëherë sapo ndeshja përfundoi një prej lojtarëve arabë goditi me shkelm një malajzian.

Më pas një sherr gjigand pasoi me lojtarë nga të dy palët që u përleshën brutalisht ndërsa zyrtarë të dy federative u futën në fushë në përpjekje për të qetësuar situatën. Ndeshja ishte organizuar si një përgatitje për lojërat Aziatike që nisin javën e ardhshme, por përfundoi në një sherr masiv.