Lajme të mira për trajnerin e Kosovës, Bernard Challandes në prag të ndeshjet kualifikuese të Euro 2020 ndaj Malit të Zi.

Në konferencën për shtyp dhënë para testit miqësor me Gjibraltarin, tekniku zvicerian ka zbuluar se futbollistë si Milot Rashica, Vedat Muriqi, Paqarada dhe Vojvoda, pavarësisht disa problemeve fizike do të jenë të gatshëm për duelin ndaj fqinjëve.

“Milot Rashica do të stërvitet sot, por do të jetë i ndarë nga grupi tjetër. Besoj se ai do të jetë i gatshëm për ndeshjen e të hënës. Vedat Muriqi do të stërvitet normalisht dhe nuk ka probleme, pasi fillimisht kishte ndjerë dhimbje të vogla në muskuj, mirëpo do të jetë me ne. Paqarada dhe Vojvoda kanë po ashtu disa lëndime, por jo serioze, ata mund të stërviten normalisht, jo me intensitet të lartë, por është në rregull”, ka përfunduar trajneri i ‘Dardanëve’.

Kosova dhe Gjibraltari do të luajnë nesër miqësoren e cila nis në orën 18:00 në stadiumin "Fadil Vokrri", në kuadër të përgatitjeve për duelin e vlefshëm për grupin A kualifikues të Europianit, atë të 14 tetorit ndaj Malit të Zi.