Shtatë gola me fanellën e Psg në një muaj, nga të cilat katër në Ligue 1 e tre në Champions League, nuk kanë mjaftuar të bindin trajnerin e Argjentinës Scaloni të rithërrasë në Kombëtare Mauro Icardi. Ish-kapiteni i Inter nuk figuron aspak në listën e të grumbulluarve të Albiceleste për dy takimet miqësore të luksit, kundër Brazilit (15 nëntor) e Uruguajit (18 nëntor). Kthehet në kombëtare Lionel Messi pas skualifikimit, ndërsa para Icardit preferohen Paulo Dybala e Lautaro Martinez.

Lajmi më i rëndësishëm për Scaloni është rikthimi i Messi, që vesh përsëri fanellën e Argjentinës, pasi ka përfunduar skualifikimin tre mujor të vendosur nga Conmebol gjatë edicionit të fundit të Kupës së Amerikës, me motivin se ka kritikuar punën e arbitrit.