Finalja e Kupës së Shqipërisë do të vërë përball mbrëmjen e sotme ekipin e Laçit me atë të Skënderbeut.

Për laçjanët kjo është hera e katërt në pesë vjet që garojnë për këtë trofe .Laçi ekspert i Kupës, me një marrëdhënie dashurie intensive me trofeun e dytë futbollistik për nga rëndësia në vend.

Ndërsa, Skënderbeu nuk e ka fituar asnjëherë këtë kupë, e cila është një trofe që deri vitin e kaluar nuk kishte arritur të ndizte shkëndijën e dashurisë në skuadrën korçare që ishte në finale edicionin e kaluar ku humbi përballë Tiranës, por këtë vit duket se gjërat kanë ndryshuar këtë vit.

Skënderbeu kërkon  trofeun që i mungon në larmishmërinë e trofeve të klubit dhe mbi të gjitha triumfin e dyfishtë në kampionat e Kupë.

Laçi ekspert i ndeshjeve për kupën e vendit do të bëjë gjithçka mundet për të rimarrë këtë trofe, ndërsa Skënderbeu nga ana tjetër do t’i shtojë raftit të tij të kupave edhe këtë trofe që i mungon deri më tani.

Bilanci sezonal thotë dy fitore të Skënderbeut dhe dy të Laçit, ajo e fundit që la një shije veçanërisht të hidhur për Ilir Dajën, por kjo është një ndeshje tjetër, një finale Kupë ku gjithçka është për t’u fituar.

Takimi i kupës do të luhet në orën 19:00./55news.al