Admiri është vegël dhe jo organizatori i grabitjes së parave në Rinas. Kështu u shpreh vëllai i Admir Muratajt, që ka mbetur i vrarë gjatë shkëmbimit të zjarrit me policinë, disa minuta pas grabitjes së ndodhur në pistën e aeroportit të Rinasit.

Murataj është identifikuar nga familjarë të tij, ndërsa policia më parë foli për ngjashmëri mes viktimës dhe Admirit.

Ndërkohë që familjarët presin tërheqjen nga morgue i Tiranës të trupit të pajetë, Cen Murataj ka hedhur poshtë versionin që vëllai i tij, Admiri, të ishte organizatori i grabitjes.

“Do t’i gjejmë ata që kanë hedhur në rrugë vëllain tim. E kanë hedhur shokët, nëse nuk e zbulon policia, do e zbulojmë ne. Ai është vegël, nuk është organizator i grabitjes”, u shpreh Cen Murataj. Vëllai  i Admir Murataj, Ceni ka dhënë një deklaratë të fortë për mediat, nga morgu ku ndodhet trupi i personit të vrarë gjatë ditës së djeshme në Rinas.

Vëllai i viktimës ka hedhur akuza të forta në drejtim të shokëve të Admirit, pasi ata e lanë të vdiste në mes të rrugës.

-Ju tha policia se si u vra, nga policia apo shokët?

Nuk kemi asgjë të saktë, dimë që thonë e kanë hedhur shokët e vet.

-Vëllai jetonte në Kamëz, por ishte në kërkim?

Nuk e besoj, unë prej dy vitesh nuk komunikoja më vëllanë.