Gjatë intervistës së tij me gazetaren Eni Vasili në “Studio e Hapur”, ish-gjenerali i dënuar nga Enver Hoxha u ndal edhe te Konferenca e Tiranës në vitin 1955. Parllaku theksoi se ky moment ishte një shans për ndryshim, por dështoi sepse u përqëndrua vetëm në Tiranë dhe nuk u zgjerua.

Një moment tjetër, i cili sipas Parllakut ishte moment i përshtatshëm, por që nuk u shfrytëzua, ishte momenti kur Shqipëria doli nga Traktati i Varshavës.

Parllaku: “Konferenca u bë pas deklarimeve të Krushovit kur dënoi krimet e Stalinit dhe bashkë me të po dënoheshin dhe udhëheqjet e partive. Ky moment ishte për ndryshime dhe tek, por fatkeqësia ishte se nuk u përpunua si duhet opinioni për një veprimtari të tillë. Por pati edhe momente që duhej larguar, se u përzie ndërhyrja e jugosllavëve me konferencën. Grupin e drejtonte Beqir Balluku.

Pati personalitete që u përfshinë në ketë veprimtari, po ishte përqendruar vetëm në Tiranë dhe nuk pati zgjerim. Mu më kërkuan që të diskutoja në mbrojtje të asaj. Unë thashë që nuk diskutoj dhe iu shmanga. Kur dola në pushim pashë dy shokë që po diskutonin më këshilltarët e ambasadës se Jugosllavisë. Kisha një urrejtje ndaj jugosllavëve. Kjo veprimtari ishte vetëm ndaj një grupi që mendonin se duhej të bëhej ndryshimi, por nuk pati mbështetjen e duhur.

Mehmet Shehu e kapi këtë gjendje dhe Enveri e mori drejtimin e konferencës vetë. Ai e theu opinionin dhe e drobiti konferencën. Entuziazmi për ndryshim u kthye në kundërveprim. Unë nuk shkova në Konferencën e Tiranës. Ai moment për ndryshim nuk u shfrytëzua. Momenti tjetër ishte kur dolëm nga traktati i Varshavës që nuk u shfrytëzua për ndryshim”.