Në vazhdën e “mbirjes” së taksave  të reja për biznesin e vogël, qeveria ka menduar edhe për zbatimin e gjobëvënieve.

Kështu, Drejtoria  Përgjithshme e Shërbimeve të Transportit Rrugor do të nisë kontrollet në pikat e riparimit të automjeteve.

Kriteret janë të ndara në kategori për riparimin e pjesëve mekanike, riparimin e karrocerisë, riparimin e impiantit elektrik, riparimin e gomave, por edhe për subjektet që tregtojnë mjete me motor dhe rimorkio apo kryejnë grumbullimin dhe shkatërrimin e mjeteve të dala jashtë përdorimit apo të braktisura.

Lista me kriteret është e ndarë për pajisjet dhe instrumentet, ambientin si dhe dokumentacionin e nevojshëm. Krahas mjeteve të punës, kriteret kërkojnë zotërimin e një kompjuteri, pajisjet e mbrojtjes nga zjarri dhe kutinë e ndihmës së shpejtë. Sa i takon ambientit, ai duhet të jetë të paktën 30 metër katror, të ketë zyrë për punë administrative dhe nyje hidrosanitare (tualet).

Madje do të kryhet edhe kontrolli për aftësinë, ku  vërtetimi i aftësisë profesionale për ushtrimin e veprimtarisë së agjencisë lëshohet nga vetë  Drejtoria e Përgjithshme e Shërbimeve të Transportit Rrugor, pasi titullari ka marrë provimin e aftësisë nga komisioni i ngritur me urdhër të ministrit që mbulon fushën e transportit, me punonjës të drejtorive që mbulojnë këtë veprimtari në ministri dhe të Drejtorisë së Përgjithshme të Shërbimeve të Transportit Rrugor.

Gjobat do të variojnë nga 200-700 mijë lek të reja, afërsisht sa ç’janë  fitimet e këtyre subjekteve në një muaj punë.