Një konflikti me armë mes dy të rinjve ka arritur të parandalohet me ndërhyrjen në kohë të policisë në qytetin e Elbasanit.

Në Sallën Operative të Drejtorisë Vendore të Policisë Elbasan ka ardhur një telefonatë se në lagjen “Kala” të qytetit Elbasan, ka një konflikt mes dy të rinjve, ku njëri prej tyre dyshohet se ka dhe armë zjarri.

Në vendngjarje kanë mbërritur menjëherë forcat e policisë.  Shtetasi E.S., që dyshohet se kishte dhe armën e zjarrit tip Pistoletë, është larguar me shpejtësi sapo ka parë policinë

Burime nga grupi hetimor bëjnë me dije se shtetasi E.S., 31 vjeç, banues në Elbasan, pas një konflikti për motive të dobëta ka goditur me grusht si dhe ka kanosur me armë zjarri, pistoletë, shtetasin A.H, 24 vjeç, banues në lagjen “5 Maji”.

Vijon puna për kapjen e shtetasit të shpallur në kërkim, si dhe për gjetjen e sekuestrimin e armës së zjarrit.

Materialet do ti kalojnë Prokurorisë së Rrethit Gjyqësor Elbasan, për veprën penale “Dëmtime të tjera me dashje”, “Kanosje” dhe “Prodhimi dhe mbajtja pa leje e armëve të zjarrit”, parashikuar nga nenet 90, 84 dhe 278 të Kodit Penal.