Mirela Kumbaro ministrja në largim e Kulturës shprehet se në vitet që ajo drejtoi ministrinë janë shpëtuar dhjetëra monumente të kulturës. “Krenare po shumë ama, për punët e bukura të duarartëve të trashëgimisë kulturore, ku kemi shpëtuar e nxjerrë në dritë dhjetëra e dhjetëra monumente kulture, ja pak prej tyre nga viti 2018, në 2 minuta të vogla”, shkruan Kumbaro në profilin e saj në Facebook, ndërsa ka publikuar dhe një video me monumentet. Por Forumi për Mbrojtjen e Trashëgimisë Kulturore shprehet se në këto pesë vite sistemi i trashëgimisë nuk ka qenë asnjëherë më keq se sot. Publikimeve të fundit që ministrja në largim Mirela Kumbaro po bën këto ditë për monumentet e kulturës në vend, Forumi për Mbrojtjen e Trashëgimisë Kulturore i përgjigjet që premtimet në këtë sektor nuk janë mbajtur.
“Requiem për epokën e Qerimesë. Merita kryesore e Kumbaros ishte fakti që në këto 5 vjet sistemi i trashëgimisë nuk ka qenë asnjëherë më keq se sa sot. Asnjë nga premtimet e Partisë Socialiste në këtë sektor nuk është mbajtur. Sistemi i kujdestarëve të monumenteve nuk funksionon. Monumentet që bien janë pa fund. Qendrat e mëdha nuk kanë ciceronë. Të ardhurat e vizitorëve nuk dihet se ku shkojnë. Durrësi një turp i madh i kësaj ministrie, Kruja e mbushur me ndërtime apo Butrinti ku ministrja ndërtoi një restorant mbi rrënojat antike”, shkruan Forumi për Mbrojtjen e Trashëgimisë Kulturore. Shumë kritik gjatë mandatit të ministres së Kulturës Mirela Kumbaro, Forumi vijon se në këto vite nuk pati asnjë risi në administrimin e trashëgimisë kulturore në vend.
“Ministria e Kulturës nuk solli asnjë risi në administrimin e trashëgimisë, por vazhdoi me sistemin, të cilin e përqeshi kur ishte në opozitë. Monumentet restaurohen me tender duke shkatërruar përfundimisht ekipet restauratore profesionale dhe në fund "risitë"qesharake" të Qerimesë: festivali i fustanellës apo banalitete të tjera si promovimi i leximit me fushata seksiste. Epoka e Qerimesë do të mbahet mend si një epokë e turpshme e trajtimit të trashëgimisë kulturore. Për fat të keq, me anonimatin që vjen pas saj paralajmëron ditë edhe me të këqija për trashëgiminë”, përfundon Forumi për Mbrojtjen e Trashëgimisë Kulturore.
