Mozaiku i Tiranës, monument kulture i kategorisë I, është siti arkeologjik më i vizituar i kryeqytetit.

Punonjësit e Drejtorisë Rajonale të Kulturës Kombëtare Durrës në Sektorin e Tiranës, po kryejnë një punë sistematike, e cila bëhet periodikisht për mirëmbajtjen dhe kujdesin e veçantë për objektet që ndodhen aty, pasi kanë një vlerë të veçantë historike dhe kulturore.

Ky mozaik tashmë është kthyer dhe në një vend i cili vizitohet nga nxënës dhe studentë të cilët shfaqin interes për të mësuar rreth historisë dhe vlerave që ai mbart.

Së fundmi ky mozaik ka mirëpritur studentët e Drejtorisë Rajonale të Formimit Profesional, studentët e kursit të guidave turistike .Studentët ishin të fushave të ndryshme, histori, gjeografi, anglisht, ekonomik, juridik etj.

Gjatë orëve të guidës, specialistët e trashëgimisë kulturore të sektorit të Tiranës së DRKK Durrës, u dhanë studentëve informacione në lidhje me trashëgiminë kulturore materiale të qytetit të Tiranës dhe në veçanti informacion në lidhje me mozaikun dhe objektet që ndodhen pranë mozaikut.