Regjisorja Klaudia Hila sjell për fëmijët në skenë premierën "Vallja e pinguinëve” në Teatrin e Kukullave. E njohur në jetën artistike për punën e saj me teatrin, këtë herë shfaqja që ajo sjell në skenë për fëmijët është shkruar nga autori Vangjel Kozma. Sot premiera është pasdite në teatër, por regjisorja tregon se për fëmijët do të vijojë çdo fundjavë. “Vallja e pinguinëve” është një vepër që është shkruar nga Vangjel Kozma dhe trajtohet një fabul e vogël dhe shumë thjeshtë, që nuk kemi nevojë që të marrim gjëra nga të tjerët për të qenë të bukur. Mjafton të përdorim pjesën tonë të mirë dhe që nga ai moment ne më pas jemi shumë të vlefshëm”, tregon regjisorja Hila për mesazhet e veprës teatrore në skenë për fëmijët. Nuk është hera e parë që si regjisore Klaudia Hila ka bashkëpunuar me autorin Vangjel Kozma. Aktorë në vepër janë Ermonela Alikaj, Ilia Kaçi, Elidon Alika, Aleksandër Grami, Flori Kokona, Albana Koçaj Sançolli dhe Madi Selimi. Kukullat nga Matilda Mehmetaj dhe skenografia Artemida Demiri. Edhe vetë Teatri i Kukullave shkruan se është një shfaqje, që do të përcjellë shumë për fëmijët. “Këtë fundjavë për ju kjo shfaqje e bukur! Ju duam e ju kemi. Ejani të njihni këta pinguinë të mrekullueshëm”, shkruan teatri për këtë premierë.