Tetë persona kanë mbetur të plagosur në Suharekë nga vërshimet dhe përmbytjet e mbrëmjes së djeshme. Këtë e bëri të ditur shefi i Urgjencës së QKMF-së në këtë komunë, Sahit Halitjaha.

“Që nga mbrëmë në urgjencë janë trajtuar 8 persona të cilët kanë marrë lëndime të lehta pas gjendjes së shkaktuar nga vërshimet në fshatra dhe qendër të Suharekës. Të gjithë pacientët kanë marrë shërbime të nevojshme”, tha ai.

Ndërsa në Njësinë Shpëtuese dhe Zjarrfikëse në këtë komunë për Kallxo.com, thanë se një pjesëtar i tyre duke larguar ujin ka marrë lëndime më serioze në krah dhe është dërguar me urgjencë në spitalin e Prizrenit. Suhareka që nga mbrëmë është përballur me vërshime dhe nga reshjet janë përmbytur shtëpi banimi në 50 për qind të fshatrave në këtë komunë.