Nga Kastriot Dervishi

Me vendimin nr.12, datë 26.1.1974 Gjykata Popullore e Beratit e drejtuar nga Irakli Puka, deklaroi fajtor e dënoi Sokol Sejkon me pushkatim të akuzuar në bazë të neneve 64 e 76 të Kodit Penal me vdekje dhe në bazë të neneve të tjera 70 e 73 me burg. Përfundimisht e dënoi me vdekje. Sokol Sejko u ekzekutua më 6 mars 1974, ora 24.00, “në vendin e caktuar”.

Sokol Sejkon e dënoi me vdekje në shkallën e parë të gjykimit ishte përfaqësues tipik i regjimit. Një punëtor partie i sajuar. Mishërues i luftës së klasave. Sipas të dhënave të vetë Partisë së Punës, Irakli Fani Puka, lindur në Paftal të Beratit në vitin 1928, nuk ishte jurist. Vlerësohej “pjesëmarrës në luftën nacionalçlirimtare”, pavarësisht se në vitin 1939 ishte 11 vjeç dhe në mbarim të saj 16 vjeç. Kish punuar në organet e partisë, ndërsa nga viti 1951 në organet e prokurorisë si ndihmësprokuror më pas prokuror, në Fier dhe Qytetin Stalin. Në vitet 1965-1968 ishte prokuror në Berat, ndërsa në vitin 1968 zgjidhet kryetar i Gjykatës së rrethit të Beratit. Organizata e partisë i vinte në dukje se ende nuk e kish mbaruar shkollën e lartë me korrespondencë. Kishte probleme edhe të brendshme. Me gjithë vërejtjet, partia e emëroi në atë detyrë për shërbimet e garantuara të tij.