Nga Kastriot Dervishi

Në vitin 1929, ministrat shqiptarë u veshën me kostume kombëtare në një ceremoni krejt të pazakontë të parë më parë. Përgjithësisht ministrat nga jugu u veshën me veshjet e veriut dhe e kundërta. Në këtë mënyrë, ata dhanë mesazhin e unitetit kombëtar për të flakur tej çdo frymë përçarje që shpesh herë sillet vërdallë në mjedisin shqiptar. Kjo fotografi e realizuar nga "Marubi" në shkallët e Oborrit Mbretëror, përcillet për portalin jo vetëm si fakt historik, por edhe për të njohur figurat e kaluara politike. Në skaj në këtij pozimi, qëndrojnë gjenerali Leon De Gilhadi, i cili u vra në kryengritjen e Fierit të vitit 1935, si dhe kolonel Osman Gazepi. Ky i fundit, u burgos pas lufte nga komuniste dhe vdiq pak vite pas daljes nga burgu. Nga personat që kanë dalë në foto, Kostaq Kotta dhe Sali Vuçiterni vdiqën në burgjet e komunizmit. Hiqmet Delvina dhe Musa Juka u larguan nga Shqipëria në vitin 1939 dhe vdiqën në emigracion. Abdurrahman Dibra u burgos nga komunistët. Milto Tutulani, babai i dëshmorëve Kristaq e Margarita Tutulani, vdiq në vitin 1932. Familjes së tij, përfshi dëshmorët e ardhshëm, iu lidh një pension jetik nga Mbreti Zog.