Qeveria britanike është ajo që ka hedhur më shumë para në kërkim të vaksinës kundër koronavirusit të ri. Ndërsa zyrtarët e lartë shtetërore e pranojnë se kanë potencialin për të shpikur vaksinën, por jo për ta prodhuar në masë, gara ka nisur.
Imperial College London, një nga institucionet kërkimorë më prestigjiozë në vend dhe botë, ka bërë thirrje për vullnetarë. ICL pritet të nisë testimet te njerëzit për vaksinën potenciale.
Kushdo që do të marrë pjesë, duhet të jetë nga mosha 18 deri në 55 vjeç dhe duhet të jetë i shëndetshëm. Pagesa për të marrë pjesë në këtë studim do jetë deri në 625 sterlina.
Kurse Universiteti i Oksfordit në Britani pritet që të nisë testimet te njerëzit të enjten.

Ministri i Shëndetësisë, Matt Hancock tha se qeveria do u japë shkencëtarëve të Oksfordit edhe 20 milionë sterlina për testimet. 22.5 milionë sterlina do të shkojnë për ICL.

Pavarësisht se shkencëtarët thonë se duhet të presim 18 muaj për vaksinën, ekspertët e Oksfordit thonë se duhet të nisë prodhimi në masë i saj pa u provuar akoma efektshmëria.

Po ashtu ata premtojnë se vaksina mund të jetë gati në shtator.