Në Gjermani numri i rasteve me koronavirus është rritur në javët e fundit. Të dhënat nga Instituti Robert Koch (RKI) për sëmundje infektive të mërkurën treguan se janë regjistruar edhe 1.510 raste të reja, duke e çuar numrin e përgjithshëm të të infektuarve në 226.914.
Instituti tha se 39% e rasteve, me gjasë janë importuar nga Kosova, Turqia dhe Kroacia, vende këto të cilat përmenden si burim i infeksionit në javët e fundit, raporton Reuters.
Ndërkohë, kreu i rregullatorit të vaksinave në Gjermani tha se disa grupe njerëzish që jetojnë në Gjermani mund të vaksinohen në fillim të vitit të ardhshëm kundër koronavirusit.
Deri më tani, sëmundja COVID-19, ka vrarë pothuajse 800,000 në të gjithë botën dhe ka dëmtuar rëndë ekonominë globale.
Klaus Cichutek, kreu i Institutit Paul Ehrlich, tha për grupin e gazetave Funke, se të dhënat nga studimet e fazes së parë dhe të dytë treguan se disa vaksina shkaktuan një përgjigje imune kundër koronavirusit.
“Nëse të dhënat nga provat e fazes së tretë tregojnë se vaksinat janë efektive dhe të sigurta, ato mund të aprovohen në fillim të vitit”, tha ai.
Disa kompani, përfshirë Moderna, AstraZeneca, dhe Pfizer Inc, thonë se vitin e ardhshëm presin që të prodhojnë më shumë se 1 miliard doza të një vaksine.
Firma gjermane e bioteknologjisë, CureVac, nuk e ka përjashtuar mundësinë e një procesi të shpejtë miratimi për vaksinën e saj të ardhshme dhe pret që ta nxjerrë në treg deri në mesin e vitit 2021.

Rusia ka thënë që vaksina e saj do të prodhohet deri në fund të këtij muaji.

Sipas Organizatës Botërore të Shëndetësisë, 25 vaksina aktualisht janë duke kaluar në prova klinike dhe më shumë se 100 janë duke u zhvilluar në të gjithë botën.

Faza 3 e testimit përfshin miliona njerëz dhe procesi zgjatë për disa muaj, thotë OBSH-ja, e cila ka kërkuar nga të gjitha kompanitë dhe shtetet që t’i përmbahen udhëzimeve për prodhimin e vaksinave të sigurta dhe efektive.