Luftëtarët “Cossack” me qëndrime pro Kremlinit, pikërisht ata që përdorën shkopa gome ndaj protestuesve në mitingun opozitar në Moskë gjatë fundjavës, pritet të patrullojnë rrugët në kryeqytetin rus gjatë zhvillimit të Kupës së Botës.
Kozakët, që zakonisht mbajnë kapela leshi, bashkuan forcat me policinë dhe forcat e sigurisë të Gardës Kombëtare për të shtypur protestën e së shtunës që u mbajt përpara betimit të Vladimir Putinit, këtë të hënë, për mandatin e katërt presidencial.
Më shumë se 700 persona, përfshi edhe udhëheqësin e opozitës Alexei Navalny, u prangosën.
Navalny u lirua mëngjesin e së dielës, por përballet me rrezikun e 30 ditëve burgim me akuzën e organizimit të një mitingu të paligjshëm. Ai është urdhëruar të dalë para gjyqit më 11 maj.
Por, protestues të shumtë u mblodhën edhe në dhjetëra qytete të tjera anembanë Rusisë, në ato që konsiderohen si demonstratat më të mëdha anti Putin prej mbi një viti.
“Do të merremi me këdo që kërkon të shqetësojë Putinin”, është cituar të ketë thënë një kozak i paidentifikuar me emër, nga faqja e internetit “Meduza”. Kozakët përdorën edhe shkopinjtë e gomës ndaj protestuesve, që ishin mbledhur në sheshin “Pushkin” të Moskës.
Disa prej tyre u identifikuan si pjesëtarë të “Central Cossack Troops” (CCT), një organizatë që ka lidhje të ngushta me forcat e sigurisë së Rusisë. Administrata e Kremlinit ka paguar rreth 190 mijë paund ndaj kësaj organizate për të trajnuar kozakët për garantimin e sigurisë publike në çfarëdolloj shfaqjeje që mund të mbahet në qytet, sipas dokumenteve të publikuara nga zyra e kryebashkiakut.
Pjesëtarët e organizatës kozake janë takuar së fundi me zyrtarë të Gardës Kombëtare për të diskutuar mbi operacionet e sigurisë gjatë Kupës së Botës, që do të fillojë më 14 qershor. Media ruse e identifikon “atamanin” (udhëheqësin) e CCT-së si Ivan Mironov, një ish-oficer i shërbimit të sigurisë së FSB-së.
Ky lajm vjen në kohën kur hijet e kërcënimeve nga Shteti Islamik rëndojnë ende mbi Botërorin e futbollit që do të nisë më 14 qershor në Rusi.
Organizata terroriste islamike ka aktivizuar edhe zyrtarisht rrjetin e saj propagandistik në prag të turneut më të rëndësishëm të futbollit në planet.
“Vritini të gjithë” është mesazhi i frikshëm që shoqëronte një poster të publikuar nga “SITE”, shoqata që monitoron aktivitetin “online” të terroristëve islamikë, me një thikë që duket se ndan në mes trofeun e Kupës së Botës.
Posteri është i fundit i një serie të gjatë kërcënimesh, që Shteti Islamik ka publikuar me kohë, edhe në lidhje me futbollin.
Në prill ishte një paralajmërim për Putinin, ku thuhej “do të paguash për vrasjen e myslimanëve”, në një postër që shfaqte një xhihadist me kallashnikov në duar. Në mars, terroristët kërcënuan Lionel Messin, të veshur me portokalli, si personat e ekzekutuar në videot e propagandës së tyre, të gjunjëzuar dhe pranë një xhihadisti të gatshëm për ta vrarë.
Në muajt në vijim do të shfaqeshin postera të tjerë me futbollistë të gjakosur. Motivi i kësaj urrejtjeje nga ana e ISIS në lidhje me Rusinë vjen nga fakti që presidenti Putin ka mbështetur regjimin sirian të Bashar al-Assad.
