Në daljen time para mediave, e cilësoja rritjen e çmimit si një aferë bazuar në disa deklarata të mëparshme të vetë Kryetarit të Bashkisë i cili ishte angazhuar publikisht se çmimi i ujit nuk do të rritej në asnjë variant, si në privatizimin ose jo, të UKT-së.

Në padinë e tij, Kryebashkiaku Veliaj e cilëson deklaratën si shpifëse dhe që i ka shkaktuar “Një turbullim të padrejtë të gjëndjes shpirtërore” dhe “cënim të nderit dhe personalitetit të tij”.

Kryebashkiaku Veliaj përfaqësohet në këtë gjykim nga i njëjti avokat që mbron dhe Deputetin Taulant Balla, i cili gjithashtu ka paditur disa përfaqësues të opozitës për shpifje.

Në këtë gjykim, përfaqësuesit e Z. Veliaj kanë paraqitur për herë të parë si prova dhe statuset në rrjetet sociale të një zgjedhuri vendor si dhe komentet shoqëruese të qytetarëve. Për këtë arsye vendimi mund të përbëjë potencialisht një jurisprudencë për të ardhmen nëse dhe deklarimet personale në rrjete sociale mund të quhen të karakterit shpifës ose jo.

Rikujtoj që cmimi i ujit u rrit falë votave “dizidente” të disa këshilltarëve të opozitës si dhe që Autoriteti i Konkurrencës së Republikës së Shqipërisë, në një vendim të dhjetorit 2017 e ka cilësuar rritjen e cmimit të ujit si jo-transparente, të pabazuar në analiza dhe që rëndon konsumatorët.

Deklarata e 15 nëntorit mund të gjëndet e plotë në videon në linkun më poshtë, shoqëruar nga disa ekstrakte të Veliajt. Secili le të gjykojnë vetë kush gënjen apo mashtron në të vërtetë qytetarët e Tiranës...