Kryetari i Partisë Demokratike, Lulzim Basha, ka bërë të ditur se sot pasdite, në orën 5:00, së bashku me Grupin parlamentar demokrat do të jetë në protestën e banorëve të Unazës së Re dhe i ka bërë thirrje qytetarëve t’u bashkohen banorëve protestues që po mbrojnë shtëpitë e tyre.

Një thirrje më vete i ka bërë Policisë së Shtetit.

"I bëj thirrje, - tha Basha, - çdo polici dhe policeje të mos vihet në vijën e sakrifikimit dhe të përballjes me vëllezërit dhe motrat e tyre që mbrojnë shtëpitë e tyre, por të bëhet pjesë e qëndresës dhe e përballjes.

Nuk do të lejojmë që kjo megaaferë korruptive e agait të Surrelit për të mbushur xhepat e tij dhe ortakëve të tij e të ndonjë pronari mediash, të shkatërrojë jetët e qindra vogëlushëve dhe të shkaktojë më shumë viktima të pafajshme.

Sot në orën 5 përsëri do të ketë protestë. Përsëri Partia Demokratike, unë, Grupi parlamentar, do të jemi aty.

I bëjmë thirrje qytetarëve të bashkohen, për të qëndruar fuqimisht kundër këtij hajduti dhe të çmenduri që e ka për mision të tij të vjedhë Shqipërisë dhe ta zbrazë atë nga shqiptarët e ndershëm. “