Nënkryetari i Lëvizjes Socialiste për Integrim, Petrit Vasili flet për skandal teksa thotë se nuk ka lekë për shpërblimin e fundvitit.

Ai thotë se Ministrja e Financave thotë me gojën plot se nuk ka planifikuar asgjë për shpërblimin, që u jepet pensionistëve për festat e fundvitit.

"Thotë ministrja gjithashtu: të presim e të shohim sa para do mblidhen në arkën e shtetit dhe po doli gjë për pensionistët mirë dhe po nuk doli gjë prapë mirë. Qeveria e rilindjes e ç'organizuar, e dështuar dhe pa rezultate nuk planifikon dot as për dy muaj më pas se çdo të ndodhë me të ardhurat publike. Për koncesionet lekët nuk mungojnë megjithëse janë miliarda, ndërsa për shpërblimin e pensionistëve s'e vë njeri ujin në zjarr. Turp. Për pensionistët që jetojnë me sakrifica të tmerrshme ekonomike nuk ka lekë, ndërsa për oligarkët lekët nuk mungojnë kurrë", shkruan Vasili.

Ai thotë se Edi Rama bën dërr dërr për "bashkeqeverisjen me qytetarët" dhe nuk u jep as shpërblimin e fundvitit pensionistëve.

Sipas tij, Edi Rama flet edhe për "Shqipërinë solidare" dhe për vete nuk është solidar as me shtresën më të vuajtur që janë pensionistët.

Vasili akuzon Kryeministrin se përgjysmoi tatimin mbi dividentin dhe u bëri dhuratë oligarkëve miliarda lekë, por për pensionistet nuk ka lekë.

"Ndaj përbuzeni këtë hipokrit dhe mashtrues, që i urren dhe i fyen të gjithë shqiptaret dhe dashuron vetëm një gjë: karrigen e tij", thotë në mbyllje Vasili.