Ka nisur seanca gjyqësore për masën e sigurisë ndaj ish-deputetit demokrat Klevis Balliu dhe personave të tjerë, të arrestuar pas protestë te “Unaza e Re” tre ditë më parë. Dhjetë arrestime dhe 5 procedime kreu policia mbrëmjen e së dielës, Akuzat që rëndojnë ndaj të ndaluarve janë: “Organizimi, pjesëmarrja, grumbullimi dhe manifestime të paligjshme”, “Pengimi i qarkullimit të mjeteve të transportit”, “Prishje e rendit dhe qetësisë  publike, “Kundërshtimi i punonjësit të policisë së rendit publik”, “Mosbindja ndaj urdhrit të punonjësit të policisë së rendit publik”.

Anëtarë të opozitës dhe banorë të “Unazës” janë vendosur në ambientin para Gjykatës së Tiranës, duke kërkuar lirimin e të arrestuarve. Nënkryetari i PD-së, Edi Paloka i cilësoi arrestimet politike. Ai tha se në burg duhet të ishin zyrtarët që kanë shkelur ligjin dhe jo qytetarët që protestojnë për të drejtat e tyre.

 “Afera e Unazës është diskretituar dhe ka shkuar në Amerikë. Kjo qeveri vazhdon luftën ndaj qytetarëve. Në vend që në burg të ishte Tahiri, Gjikuri, në burg futen qytetarët e thjeshtë. Ky shtet ka marrë fund për gjithçka dhe thotë Rama na kanë inat dhe s’na hap negociatat BE”, tha Paloka në një prononcim për gazetarët.

“Shpresoj që gjyqtarët të kenë integritet dhe të japin drejtësi dhe nëse japin drejtësi qytetarët duhet të jenë jo pas hekurave, por në shtëpitë e tyre”, u shpreh numri 2 i Partisë Demokratike.