Emigracioni nuk është zgjidhja. Asnjë vend i huaj nuk na bëhet si shtëpia jonë. Është ky apeli që kreu demokrat Lulzim Basha i ka drejtuar të rinjve dhe të rejave gjatë një takimi të zhvilluar në Vlorë në kuadër të turit “Rrugëtimi për Shqipërinë”.

Basha tha se rinia po përjeton braktisje totale nga kjo qeveri, duke shtuar se ajo është dështimi më i madh i këtij kryeministri, ndaj rinia është grupmosha që po i drejtohet më shumë emigracionit.

“Të shihemi sy më sy dhe të flasim për gjithë ato probleme që ju shqetësojnë, por edhe për shpresat që ky rrugëtim të çojë në ndryshimin që kërkon shumica e shqiptarëve.

Rinia duhet të marrë fatin e vendit në dorë. Ka ardhur koha të mos bëjmë kompromis në kurriz të rinisë.

Në Shqipëri klima për biznesin është toksike”, theksoi Basha.

Në fjalën e tij, kreu demokrat gjithashtu komentoi edhe lirimin e Alvin Berishës nga kampi famëkeq i Al Hol në Siri.

“Dua të shpreh kënaqësinë time edhe si prind për lajmin e Alvinit. Ka qënë një dramë e madhe. Rrugë të mbarë Alvinit në rrugën drejt gjirit të familjes. Tragjedia nuk mbaruar., janë shumë fëmijë të tjerë që duhet të nxirren nga Siria”, tha Basha.