Kreu demokrat, Lulzim Basha, vijon turin “Rrugëtimi për Shqipërinë” në Krujë.

Basha do të takohet me të rinjtë, ku ashtu si në Elbasan, Vlorë, Korçë e Shkodër, do të shpalosë programin e PD-së për rininë.

Basha ka njoftuar në rrjetet sociale se “Rrugëtimit për Shqipërinë” do t’i bashkohen anëtarë të rinj, nga Kruja: “Rrugëtimit për Shqipërinë” do t’i bashkohen sot anëtarë të rinj. Ju ftoj të më ndiqni sot në orën 17:00 nga Kruja”.

Me këtë takim, Basha përmbyll javën e parë të Rrugëtimit për Shqipërinë gjatë së cilës ka përshkruar 5 qytete: Elbasanin, Korçën, Shkodrën, Vlorën dhe Krujën.

“Emigracioni nuk është zgjidhja! Asnjë vend i huaj nuk na bëhet si shtëpia jonë. Ne kemi një plan për të mbështetur rininë nëpërmjet arsimit sepse asnjë i ri nuk duhet të mbetet pa studiuar për shkak të pamundësive ekonomike.

Pjesë e këtij plani është dyfishimi i buxhetit për arsimin e lartë dhe fokusimi te teknologjia e informacionit. Kështu do të tërheqim investime të huaja të cilat do ti japin të rinjve arsye për të qëndruar në Shqipëri dhe për ta ndërtuar të ardhmen e tyre këtu”, ka deklaruar Basha në takimet e zhvilluara deri më tani.