Pak orë pasi kryeministri Edi Rama, njëherësh dhe Ministër i Jashtëm i vendit shpalosi nga Vjena objektivat e Shqipërisë në drejtimin e presidencës së OSBE-së, ish-deputeti demokrat Aleksandër Biberaj thotë se Rama duhet ta shfrytëzojë këtë moment në funksion të Kosovës.

I ftuar në intervistën në Ora News, ish-zëvendës Presidenti i Asamblesë Parlamentare të Këshillit të Europës, porosit kryeministrin të mos e vendos presidencën e OSBE-së në shërbim të Presidentit serb Aleksandër Vuçiç.

Aleksandër Biberaj: Duke pasur presidencën e OSBE-së je një faktor i rëndësishëm vendimmarrës. Dhe mund të bëjmë shumë gjëra të mira për Kosovën por jo ta vendosim presidencën e OSBE-së në shërbim të Vuçiçit. Do të ishte ekstremi i antishqiptarizimit.

Shqipëria thotë Biberaj, duhet të jetë shumë e kujdesshme në raport me politikën e Kosovës, me interesat tona atje, sepse nuk kemi as kapacitetin e as politikanë që t'i shërbejnë kësaj çështje.

Aleksandër Biberaj: Mbroje me dinjitet. Nuk mundet kurrësesi kryeministri i Shqipërisë që të përpiqet që të bëjë faktor politik Vuçiçin i cili është pasardhës i Milloshevicit, jo se nuk ka kërkuar falje për krimet në Kosovë por ka mbrojtur masakrën e Raçakut. Dhe nuk ke pse i shërben, pse e nxjerr nga një izolim. Ne nuk mund të bëhemi përkrah tyre, përkrah Vuçiçit kundër Kosovës për interesat e tua politike.

Duke komentuar zhvillimet politike në Kosovë, Biberaj thotë se mosarritja e një marrëveshje mes dy forcave politike fituese të zgjedhjeve të 6 tetorit, do të ishte një turp i madh.

Aleksandër Biberaj: Besoj që do të arrihet një marrëveshje në Kosovë, përndryshe do të ishte turp. Nuk ka rëndësi kush e merr një pozicion plus ose minus por mendoj që të ketë një qeverisje të përbashkët, të mandatohet në parlament dhe të fillohet puna menjëherë. Për sa kohë Kosova është pa qeverisje atëherë dalin shqiptarë që mbrojnë interesat e Serbisë dhe Rusisë qëë përpiqen të përfaqësojnë interesat e Kosovës.