Në fjalën e tij në Konferencën e Donatorëve, kryeministri, Edi Rama, ndërlidhi dhe barazoi fatkeqësinë e tërmetit të madh të Nëntorit në vendin tonë, me vendimin e Bashkimit Europian për mos hapjen e negociatave të anëtarësimit.

Madje Rama vuri një shenjë barazimi, edhe pse në të dyja këto fatkeqësi ka gisht paaftësia dhe korrupsioni i qeverisë që drejton.

Rama arriti deri aty sa që e quajti ‘poshtërim’ për Shqipërinë vendimin e vendeve anëtare të Bashkimit Europian.

‘Për vendin tonë tërmeti politik në tetor u ndje si mallkimi i shoqërisë që na godiste edhe një herë.

Zgjerimi është një nga çështjet që keni në diskutim në familjen e BE, është i vështirë dhe jo gjithmonë nuk janë kohët më të lehta për të jetuar në union, por për ne që kemi bërë kaq shumë për t’u bërë pjesë, mohimi i kësaj lëvizje ishte goditje e madhe, u goditëm sikur na ishte marrë fryma.

Ndjemë dhimbjen, poshtërimin, ju lutem vlerësoni thellësinë e këtyre ndjenjave. Bëmë gjithçka mundëm dhe na u kërkua, e përsëri përgjigjja ishte jo.

Dy goditje të forta, dhe ende qëndrojmë për një të ardhme më të mirë të fëmijëve tanë. Jam i inkurajuar nga metodologjia e re, e propozimit të Francës për diskutim, dhe gjithashtu edhe reagimin e komisionit për të bërë më të mirën në Bruksel dhe në vend.

Në fund të 2019, ndërkohë që viti solli dy ditë të këqija për vendin tim, le të shënojë 2020 një vit rindërtimi, solidaritet e shprese. Besoj fort se interesi është i ndërsjellë ashtu si e ardhmja e BE dhe e Ballkanit Perëndimor’, tha Rama në fjalën e tij mes të tjerave.