Para dy ditësh, kryeministri Edi Rama sulmoi nga foltorja e Kuvendit këdo, që nga media, opozita, presidenti dhe deri te Avokati i Popullit, duke thënë se janë bërë KÇK, që duan të ndalin Anti-KÇK-në. E kishte fjalën për një nismë të qeverisë së tij, e cila është vlerësuar si antikushtetuese nga dhjetëra organizata të shoqërisë civile.

Por për të kuptuar se sa antikushtetuese janë gjërat që bën Edi Rama, mjafton të shihni një raport të fundit të Komisionit të Venecias për përplasjen mes mazhorancës dhe presidentit.

Le ta nisim nga fundi, nga nisma e qeverisë për të ndryshuar mënyrën e betimit të magjistratëve të lartë.

Komisioni i Venecias shprehet qartë në opinionin paraprak se sipas Kushtetutës, anëtari i Gjykatës Kushtetuese e fillon mandatin vetëm pasi bën betimin tek Presidenti. Pasi citojnë Kushtetutën, ekspertët e Venecias shprehen se “kjo do të thotë se anëtari [i Gjykatës Kushtetuese] nuk mund ta fillojë detyrën pa bërë betimin tek Presidenti. Betimi tek Presidenti është parakusht për marrjen e detyrës”.

Edhe në përfundimet e tyre, ekspertët e Venecias janë të prerë në këtë pikë, kur shprehen se “Dispozitat e miratuara kohët e fundit, por që ende nuk kanë hyrë në fuqi...duhet të lihen mënjanë, pasi ato duket se janë jokushtetuese”.

Kjo është vetëm një nga shkeljet kushtetuese pas skandalit të betimit te noterja te Lana. Të tjera nisin që nga ajo që u gatua në Këshillin e Emërimeve në Drejtësi me listat nga kryetari, Ardian Dvorani. Ai thuhet se e ka bunkerizuar KED-në, duke shmangur kështu institucionin që duhej ta monitoronte sipas ligjit, pra Avokatin e Popullit. Kjo është arsyeja se përse Edi Rama e përfshin edhe Avokatin e Popullit në sulmin që i bën medias, opozitës dhe presidentit. Sepse ai nuk do kurrfarë transparence për të shkelur ligjet dhe Kushtetutën siç do vetë.

Një pyetja që lind tani është: Kush është KÇK në këtë mes, ata që po denoncojnë shkeljet kushtetuese apo ai që po kap çdo institucion dhe po shkel ligjet dhe dokumentin themelor?