Komisioni i Venecias rrëzon paketën antishpifje. Në draftopinionin përfundimtar të publikuar dje në faqen zyrtare, ekspertët e Venecias shprehen se draftligji është i paqartë në versionin aktual.

“Komisioni i Venecias konsideron se projektndryshimet nuk janë gati për miratim në formën e tyre aktuale. Ligji vuan nga paqartësia dhe ka të ngjarë të ketë një ‘efekt të ftohtë’, duke shtypur diskutimin e lirë dhe fjalimin politik në sektorin shqiptar të internetit”, shkruan Venecia në konkluzionet e saj pas shqyrtimit të ligjit.

Problematikat, Komisioni i Venecias i gjen te nenet që flasin për kompetencat e shtuara, që i jepen Autoritetit të Mediave Audiovizive dhe AKEP.

Më tej, Venecia thekson se në ligj nuk saktësohet roli i AMA-s dhe AKEPit dhe në këtë mënyrë, ato mund të ndërhyjnë edhe në blogun personal të qytetarëve.

“AMA merr fuqi të mëdha administrative në lidhje me median në internet. Kjo është problematikë në lidhje me lirinë e shprehjes së mediave në internet, duke pasur parasysh se ekzistojnë dyshime për pavarësinë e atyre organeve. Këto fuqi të reja nuk duhet t’u besohen atyre organeve, pa siguruar më parë se ato janë mjaftueshëm të pavarura nga partitë politike, bizneset e mëdha të mediave ose nga korporata të tjera të lidhura me politikën”, thuhet në draftopinionin e Venecias.

Ndërkohë sugjeron se si të amortizohet ky shqetësim.

“Opsione të ndryshme janë të mundshme në këtë drejtim, për shembull duke shtuar përfaqësues të komunitetit të mediave dhe të shoqërisë civile jo të lidhur direkt me forcat kryesore politike, deri në përbërjen e AMA-s. Kjo do të zmadhojë efektin qetësues të atyre dispozitave dhe të çojë në vetëcensurim, në dëm të debatit politik thelbësor për çdo demokraci”, thekson Venecia.

GJOBAT

Komisioni i Venecias ka komentuar edhe aplikimin e gjobave për mediat online. Ekspertët thonë se ato mund të jenë të nevojshme, por sugjeron që të aplikohen nga një institucion i pavarur.

“Masat mbrojtëse shtesë duhet të futen për të garantuar procesin e duhur dhe proporcionalitetin e sanksioneve. Në dritën e mësipërme, Komisioni i Venecias rekomandon të rishqyrtojë miratimin e projektndryshimet në ligjin nr. 97/2013 (dhe draftndryshimet në lidhje me ligjin nr. 9918/2008) në formën e tyre aktuale, siç u votua nga Parlamenti në dhjetor 2019. Ky rekomandim nuk nënkupton që autoritetet shqiptare duhet të ndërpresin punën për rregullat në internet. Problemet e identifikuara nga autoritetet shqiptare janë serioze. Sanksionet e justifikueshme të ligjit administrativ mund të jenë të dobishme për të luftuar abuzimet në fushën e mediave online. Sidoqoftë, ato do të duhet të imponohen nga një organ vërtet i pavarur dhe profesional”, thekson Venecia. Në këtë kuadër, ekspertët e Venecias sugjerojnë që autoritetet shqiptare të mbështesin një organ vetërregullues.

“Për të adresuar problemin e mediave dashakeqe ose të papërgjegjshme, Komisioni i Venecias inkurajon autoritetet shqiptare të mbështesin krijimin e një organi vetërregullues të pavarur, funksionues dhe që përfshin të gjithë aktorët përkatës të komunitetit të mediave dhe të aftë për të siguruar një efektivitet dhe sistem të respektuar e llogaridhënës”, vijon rekomandimi i Venecias.