Në një raport të fundit, organizata amerikane “Judicial Watch” ka publikuar dokumente që tregojnë një bashkëpunim të ngushtë mes USAID-it dhe Departamentit të Shtetit të SHBA-së me Fondacionet e Shoqërisë së Hapur të themeluara nga George Soros.

Dokumentet tregojnë se ky bashkëpunim kishte për qëllim përfshirjen e Fondacioneve të Shoqërisë së Hapur në projekte dhe financime që synojnë mbështetjen e reformave në Shqipëri. 

Sipas dokumenteve të publikuara, fondet e USAID-it janë kanalizuar drejt Fondacioneve të Shoqërisë së Hapur në Shqipëri, me fokus të veçantë në reformat e sistemit gjyqësor që mund të ndihmojnë qeverinë socialiste të vendit të fitojë më shumë kontroll mbi gjyqësorin.

Raportohet se në vitin 2016, USAID dha një financim prej 9 milionë dollarësh për fushatën “Drejtësi për të Gjithë”, e cila mbikëqyret nga Instituti për Menaxhimin Lindje-Perëndim, një organizatë e lidhur me Fondacionet e Shoqërisë së Hapur.

Kjo mbështetje financiare verteton edhe njeherë akuzat e opozitës shqiptare, e cila argumenton se një pjesë e ndihmës financiare është përdorur për të fuqizuar agjendat e majta në Shqipëri dhe për të ndikuar në politikën e brendshme të vendit. Organizata “Judicial Watch” ka akuzuar Sorosin për ndikim të fortë në politikën shqiptare dhe për përpjekje për të kontrolluar institucionet e pavarura.

Ky zhvillim ka shkaktuar debat të gjerë mbi rolin e USAID-it dhe Fondacioneve të Shoqërisë së Hapur në vendet në zhvillim, përfshirë Shqipërinë, ku reformat institucionale dhe politike janë delikate dhe ndikimi i jashtëm shpesh shihet me dyshim nga një pjesë e opinionit publik.