Zv.ministrja e Jashtme, Klea Maliqi, e ftuar sonte në emisionin “Opinion” në “Tv Klan”, ka pranuar pa dashur dështimin e hapjes së negociatave me BE-në.

Duke dashur që të mbronte retorikat e kryeministrit sonte në Berlin, ajo ka deklaruar se negociatat mund edhe të shtyhen.

Klea Maliqi, u shpreh se vizita e kryeministrit Rama në Berlin për hapjen e negociatave për anëtarësimin e Shqipërisë në BE, ishte një vizitë e suksesshme për qëllimin dhe pritshmëritë që pala shqiptare kishte.

Maliqi theksoi në studion e emisionit “Opinion”, se ky proces e ka futur vendin tonë, por edhe shqiptarët në një garë, e cila duket se nuk ka fund.

Ajo deklaroi se, tashmë Shqipëria ka ndryshuar terren, duke u hedhur në një tjetër, në terrenin thellësisht politik.

“Shqipëria jonë dhe në të gjithë jemi pjesë e një gare, kjo është një ultra-maratonë, kemi ndërruar terren dhe nga terreni teknik ne kemi hyrë në një terren thellësisht politik”,- tha Maliqi.

Blendi Fevziu: Kjo është një maratonë e gjatë që vazhdimisht i zgjatet finishi?

Klea Maliqi: Në fakt ashtu është, një maratonë e gjatë, por është një terren politik. Gjermania nuk mund të deklaronte në këtë takim për dhënien e saj të votës ‘pro apo kundër’ hapjes së negociatave për anëtarësim me Shqipërinë, pa realizimin e këtij procesi. Ishte shumë e drejtë, që ky qëndrim të mbahej prej tyre dhe ne nuk kishim ndonjë pritshmëri tjetër. Vizita e kryeministrit ishte për të vijuar axhendën e komunikimit dhe informimit.

Më tej, Maliqi deklaroi se vizita e kryeministrit Rama në Berlin, përsa i takon pritshmërive dhe qëllimit, ishte një vizitë e suksesshme. Ajo tha se pala shqiptare nuk mund të kishte një pritshmëri tjetër rreth kësaj vizite.