“Special One’ nuk është më një i tillë pasi Man.United e shkarkon menjëherë. Humbja kundër Liverpool firmosi zyrtarisht fatin e Zhoze Mourinho-s, një marrëdhënie e cila ishte e destinuar të vinte në këtë pikë, në një kohë kur gjithçka ishte kundër teknikut portugez.

Me një deklaratë “rrufe”, klubi i United ka njoftuar zyrtarisht ndërprerjen e kontratës në mënyrë të menjëhershme e Mourinho-s: “Klubi dëshiron të falënderojë Jose për punën e bërë tek Manchester United dhe i urojmë fat në të ardhmen. Një udhëheqës i ri do të vihet në krye të skuadrës deri në fund të këtij sezoni për të zgjedhur më pas një menaxher me kohë të plotë”, lexohet më tej në njoftimin e klubit anglez.

Prej kohësh ndërmjet Mourinhos, lojtarëve dhe stafit drejtues ishte krijuar një krisje e madhe  por Mourinho me egon e tij insistonte se do të qëndronte edhe për shumë kohë në “Old Traford” por ja që drejtuesit e klubit i bëjnë “gol” duke e shkarkuar përpara kohë. Aktualisht Man.United renditet ne vendin e 6-të në Premier League, minus 19 pikë nga Liverpooli kryesues, ndërsa rrezikon ndjeshëm të mos marrë pjesë në Champions League sezonin e ardhshëm.