Në dhjetor Liverpuli eliminohej nga Kupa e Ligës: në atë rast prezantoheshin me një skuadër U-23 dhe humbisnin 5-0 përballë Aston Vilës, sepse një ditë më vonë luanin në Botërorin e Klubeve. Skuadra e Jyrgen Klopit ka vendosur që të sakrifikojë edhe Kupën FA, pas barazimit 2-2 me Shrusbëri Taunin të dielën, skuadrën e Kategorisë së Tretë.
Ata ishin duke fituar 0-2 në transfertë, por mungesa e përqendrimit bëri që vendësit të barazonin në pjesën e dytë. Rregullorja parashikon riluajtjen e ndeshjes në fushën tjetër, pra në “Anfield Road”. Por në këtë rast “Reds”-at do thërriteshin të luanin gjatë pushimit dimëror parashikuar për Premier Ligën, në të vetmin moment pushimi të një sezoni të ngjeshur me shumë ndeshje, nga Superkupa e Europës, kampionati, Liga e Kampioneve, Kupa e Ligës dhe Kupa FA.
Zemërimi i Klop – Një situatë që ka zemëruar jo pak Jyrgen Klopin, i cili ka kërcënuar që të mos e luajë këtë ndeshje me skuadrën e parë dhe as vetë të mos paraqitet në stol: “Prillin e shkuar, nga zyrat e Premier Ligës na kërkuan që të respektonim pushimin dimëror, duke mos organizuar miqësore dhe mos luajtur në kompeticione të tjera për të çlodhur futbollistët. Dhe shikoni tani, në ato dy javë duhet të luajmë ‘replay’-n e Kupës FA. Nuk do të jemi, do të respektoj atë që u kemi garantuar djemve të mi dhe do të dërgojmë në fushë edhe njëherë tjetër një skuadër U-23”, deklaroi trajneri gjerman pas barazimit me Shrusbërin. Ai zbuloi se në stol do të jetë përsëri trajneri i U-23, Neil Kriçlej, ashtu siç ndodhi në takimin kundër Aston Vilës në Kupën e Ligës në dhjetor. Prandaj më 4 shkurt do të shohim kundër ekipit të kategorive inferiore një skuadër shumë të ngjashme me atë që zbriti në fushë një muaj më parë kundër “Villains”.
Zhgënjehet Shrusbëri – Mesfushori i formacionit të Ligës së Parë, Dejv Eduards, pranoi se ai ishte i zhgënjyer nga vendimi i Klopit, por gjithsesi mundet t’i shohë aspektin pozitiv këtij vendimi. “Është pak zhgënjyes. Sigurisht që tifozët që do të vijnë në ‘Anfield’ duan të shohin futbollistët më të mirë në botë të luajnë dhe ne duam të jemi përballë tyre gjithashtu. Por nga ana tjetër, do të kemi një shans më të mirë për të fituar ndeshjen dhe kualifikuar në 1/8-at e Kupës FA. Por unë e kuptoj vendimin e tyre”, tha Eduards.
