Nëna e 35-vjeçarit Kostandin Kaçifas, që u vra në Bularat gjatë përleshjes me policinë, ka folur për mediat greke mëngjesin e sotëm, duke shprehur zemërimin për humbjen e djalit të saj.
Në një lidhje telefonike për emisionin e mëngjesit në televizionin Ant1, ajo u shpreh e pikëlluar: “Pse duhej të vritej djali im? Ishte i gëzuar sepse do të zbukuronte shkollën për 28 Tetorin, do të nderonte heronjtë. Shqiptarët nuk e duan minoritetin. Nuk dua më të jetoj pa fëmijën tim, pa shpirtin tim”.
Të afërmit e Kostandin Kaçifas, të cilat jetojnë në Athinë, kanë shkuar në fshatin Bularat për të mbështetur nënën e tyre.
35-vjeçari minoritar terrorizoi të dielën fshatin Bularat të Dropullit në Gjirokastër. Ai qëlloi me breshëri policinë dhe pas shkëmbimit të zjarrit me forcat speciale RENEA, mbeti i vdekur. Vrasja e tij ka shkaktuar përplasje diplomatike mes Shqipërisë dhe Greqisë.
