Madje deri diku mund të ndryshojë edhe fatin e tyre duke i rikthyer sërish në Francë, atje ku tentuan të nisnin një jetë të re. Familja e Amarildës, një vajze të re por mjaft të talentuar për lëndën ekzakte, u kthye të enjten e shkuar në Tiranë, me vendim dëbimi nga kryebashkiaku i Pyrénées-Orientales, i cili e realizoi vendimin gjyqësor.

Kryetarja e Lëvizjes kundër racizmit dhe për miqësinë mes popujve (MRAP), Maryse Martinez, ka shprehur vendosmërinë e saj se historia e kësaj familje nuk ka përfunduar.

“Unë jam e sigurt se ne do ta rishohim sërish Amarildën dhe familjen e Mitaj. Lufta kundër papërmbajtshmërisë, kundër pandershmërisë, kundër keqardhjes do të vazhdojë! Barbarizmi nuk mund të fitojë asnjëherë! Dhe Amarilda do të bëhet ashtu siç dëshiron ajo, sepse ajo është e shkëlqyer, ajo do të jetë një profesoreshë e shkëlqyeshme e matematikës”, thotë ajo.

Martinez thotë se ka folur në telefon me Amarildën, telefonatë e cila i ka përcjellë tronditjen e familjes shqiptare.

 “Ata ishin të gjithë shumë të tronditur, të dëshpëruar nga sjellja aq çnjerëzore. Ne gjithashtu jemi të prekur, çfarë barbarizmi! Kryebashkiaku i Pyrénées-Orientales ka një detyrë, me pushtetin e tij, të vendosë për të lejuar familjen që të jetojë në Francë, në vend se të kthejë atë në një vend tepër të rrezikshëm, për të cilin të gjithë jemi njoftuar. Por, si mund ta arrijmë këtë? Ai zgjodhi ta kthejë familjen në një rrezik ekstrem, një familje si e imja, si tuajat, një familje që mund të sjellë pasuri në Francë, si shumë refugjatë të tjerë, pa të cilën ne nuk do të ishim ata që jemi”, ka përfunduar Martinez.