Gazetarja Adelheid Woelfl ka treguar disa detaje mbi marrëveshjen e mundshme Kosovë – Serbi në shkrimin e saj në gazetën gjermane, Frankfurter Rundschau.

Edhe pse e quan ‘të rrezikshme’ marrëveshjen për shkëmbim territoresh, gazetarja thekson se Federica Mogherini dhe Johannes Hahn në Bruksel po lobojnë për miratimin e nji marrëveshje me bazë kufijtë etnikë, përcjell Rrokum.tv.

“Nën presidentin amerikan, Trump, edhe administrata e këtij vendi ka bërë kthesë 180 gradë,” shkruen Adelheid Woelfl.

Po çfarë parashikon draft-marrëveshja me 17 pika?

“Marrëveshja me 17 pika parashikon një demarkacion të ri mes shqiptarëve dhe serbëve në veri të Kosovës dhe kalimin e disa fshatrave me shqiptarë nga Serbia, tek Kosova.

Qyteti i Mitrovicës ka për të marrë status special.

Ujëmbledhësi i Gazivodës dhe miniera e Trepçës do të privatizohen për 99 vjet dhe do të ndahen midis përfaqësuesve të Këshillit të Sigurimit në OKB (SHBA, Britania, Rusia, Kina dhe Franca).

Ideja përfshin gjithashtu edhe ndërtimin e një baze detare në qytetin e Vlorës në Shqipëri – mesa duket për NATO-n, ndërkohë që në Kuçovë ka për tu bërë një bazë ajrore. Autostrada nëpër Serbi – e njohur si Korridori 10 – ka për të qene nën mbrojtje ndërkombëtare.

Marrëveshja mes Serbisë dhe Kosovës ka për tu nënshkruar në Uashington me 12 Qershor 2019, dhe ka për të hyrë në fuqi gjashtë muaj më vonë”.