Nga Kastriot Dervishi

Më 30 gusht 1938, me rastin e 10-vjetorit të mbretërisë u përurua në vendin ku sot është sheshi “Nënë Tereza”, monumenti i lirisë. Princesha Ruhije dhe ministri i Punëve të Brendshme Musa Juka ishin personalitetet kryesore të ceremonisë së zhvilluar. Pas pushtimit fashist, me zgjerimin e sheshit, monumenti u shemb, ndërsa shqiponja e tij u zhvendos në sheshin “Skënderbej”. Aty ku sot qëndron shtatorja e Skënderbeut u ngrit një piedestal për të vendosur vetëm shqiponjën. Në vitin 1945 përpara këtij piedestali u vendos një parullë e madhe ku shkruheshin fjalët: “Gjaku i heronjve tonë siguroi lirinë e popullit. Lavdi e përjetshme dëshmorëve”. Edhe ky monument u shemb në vitin 1950 për t’ia lënë vendin fillimit të punimeve për shtatoren kushtuar Stalinit. Nuk dihet ku përfundoi kjo shqiponja. Fotografitë tregojnë shqiponjën në pamjen fillestare dhe atë të mëpasme në sheshin “Skënderbej”.