Më 2.4.1991, Presidiumi i Kuvendit Popullor dhe Këshilli Presidencial, zhvilluan një mbledhje të përbashkët me objekt zgjedhjet kuvendore të 31 marsit 1991. Në këtë takim shumë të gjatë, ndër të tjera, u bisedua edhe për ngjarjet në Shkodër, vrasjet dhe djegien e Komitetit të PPSH-së së Rrethit Shkodër. I pranishëm në mbledhje ishin si të ftuar edhe ministri i Punëve të Brendshme, Gramoz Ruçi dhe kryeministri Fatos Nano.

Pjesë nga debati

Gramoz Ruçi: Veçanërisht në tre qytete, në Shkodër, Kavajë dhe në Tiranë kanë qenë më evidente. Gjendja më e rëndë aktualisht paraqitet në qytetin e Shkodrës. Në Shkodër ka pasur grumbullime pa veprime të jashtëligjshme si mbrëmë, por veçanërisht sot, janë shoqëruar edhe me veprime. Në grumbullime, pra në këto turma njerëzisht, janë vënë në radhë të parë fëmijët dhe gratë dhe dëgjohen thirrjet kundër Partisë së Punës, kundër personaliteteve politike, thirrje për armë, kundër zonave jugore dhe verilindore, kundër fshatarësisë...

***

Ramiz Alia: Mirë Gramoz, thuaj ç’ke për të thënë.

Gramoz Ruçi: Pyetja, në janë kapur njerëz apo jo? Aktualisht në Shkodër këtë porosi kam dhënë. Organet nuk mund të veprojnë ndaj njerëzve tani, për të kapur në këtë moment, përpara se të vija këtu në Presidium. Veprimi ndaj njerëzve me arrestime do të ishte katastrofale, domethënë është e pamundur, të tillë egërsi ka. Dhe aktualisht atje ka gjak.

Haxhi Lleshi: I vunë flakën Komitetit të Partisë ata.

Gramoz Ruçi: U përdorën dinamiti, zjarri, benzina, të gjitha këto. Kanë organizatorë apo jo. Kuptohet të gjitha këto turma kanë organizatorë. Në krye të organizatorëve janë si forca politike ashtu dhe të tjera. Në krye të organizimit është Azem Hajdari, të Shkodrës. Vajti që në fillim dhe është evident edhe sot. Edhe komunikimi i shokëve tanë është pikërisht me këtë person, si deputetë dhe si përfaqësues edhe i PD-së dhe dëgjohet.