Ligjvënësit opozitar në Hungari premtuan se do të ndërmarrin masa ligjore dhe parlamentare në përpjekje për të penguar kryeministrin Viktor Orban përderisa protestat për një ligj të ri të punës, u zvogëluan për nga pjesmarrja.

Rreth 200 persona u mblodhën jashtë ndërtesës së parlamentit në Budapest më 18 Dhjetor, përderisa një ditë më parë mijëra protestues u përballen me policinë jashtë selisë së transmetuesit shtetëror.

Fokusi kryesor i protestave ka qenë një ligj i sapo miratuar që ndryshon në mënyrë drastike rregullat e punës shtetërore. Grupet e opozitës e kanë quajtur atë një “ligj skllavërues”.

“Ne po planifikojmë veprime të mosbindjes civile, bllokim të rrugëve dhe së bashku me sindikatat, demonstrata të mëtejshme”, u tha gazetarëve, Timea Szabo, një ligjvënëse opozitare.

Aleatët e Orbanit i kanë denoncuar protestat si një ndërmarrje e grupeve liberale të financuara nga financuesi hungarez-amerikan, George Soros. Organizata e shoqërisë civile “Soros” ka hedhur poshtë këto pretendime.

Soros është vënë në shënjestër në mënyrë të përsëritur nga qeveria e Orbanit./REL