Ditën e sotme tre shtete të BE-së; Holanda, Franca dhe Danimarka vendosën veton për Tiranën dhe Shkupin.

Gazetarja e ‘Euronews’, Efi Koutsokosta, duke cituar burime diplomatike nga brenda mbledhjes, raporton se, Franca, Holanda dhe Danimarka janë shprehur kundër negociatave, gjithsesi, dokumenti përfundimtar nuk është publikuar ende. Lajmi se tre vende janë skeptike për Shqipërinë dhe Maqedoninë është konfirmuar edhe nga ministri i Jashtëm i Greqisë, Nikos Kotzias.

Lajmi për vendosjen e vetos ndaj Shqipërisë, e ka pasqyruar dhe media italiane “La Repubblica”.

“Franca dhe Holanda sot vunë veton për çeljen e negociatave  me BE të Shqipërisë dhe Maqedonisë, që me kërkesë të Komisionit duhet të hapen në fund të qershorit në Samit. Siç po përpunohet marrëveshja(Italia dhe Gjermania, në fakt janë favorite), mbyllja e dyerve rrezikon destabilizimin e zonës”, shkruhet më tej në artikull.