Mbrëmë ka çelur siparin kampi i Lëvizjes Rinore për Integrim në bregdetin e Jalit, një aktivitet tashmë traditë prej vitesh.

E pranishme në ceremoninë hapëse ishte edhe Kryetarja e Lëvizjes socialiste Për Integrim, e cila në një postim në rrjetet sociale ka shpërndarë një video dhe ka dhënë një mesazh për të gjithë të rinjtë shqiptarë.

Postimi i plotë i kryetares së LSI

Si çdo vit i nxehti i stinës do të freskohet me energjinë e LRI-së në Jalë.

Ka nisur sot kampingu politik i të rinjve të LSI-së, një traditë e bukur e huazuar dhe nga forumet e tjera të ngjashme, të cilat megjithatë nuk kanë mundur të “kopjojnë” dot aksionin dhe motivimin tonë, ku debatet dhe diskutimet nuk rreshtin as në orët e nxehta të ditës dhe as në ato të mbrëmjes.

Këto janë ditët kur të rinjtë mësojnë vlerat e politikës, por jo vetëm. Janë ditët kur ata “stërviten” për të qenë mbi të gjitha njerëz të mirë dhe qytetarë të ndershëm. Janë ditët dhe netët, kur edhe ne që jemi aty për t’i ndihmuar, dëgjojmë dhe mësojmë shumë për rininë, kërkesat dhe dëshirat e saj. Për ti dhënë këtij vendi një mundësi më të mirë, një shans më shumë dhe këtë padyshim do e bëjnë të rinjtë.

Me urimin për të kaluar ditë sa më energjike dhe të vlefshme i uroj LRI-së suksese në trajnimin e të rinjve, që do të jenë forca dhe motivimi ynë për betejat që na presin.