Prokuroria e Tiranës ka nxjerre fletarreste për disa funksionarë dhe ish-funksionarë të Ministrisë së Drejtësisë. Në pranga kanë përfunduar 4 persona. Për këtë po verifikohen edhe veprimet dhe përgjegjësia konkrete e ish-ministrit të Drejtësisë, Ylli Manjani por edhe ish-ministrit Petrit Vasili.

Në një reagim në facebook për këtë situatë, ish-ministri i Drejtësisë, Ylli Manjani thotë se nëse pushteti ka mbaruar punë me trafikun e drogës, kanabizimin e vendit, koncensionet e PPP, tenderat e infrastrukturës dhe abuzimet miliona e eurove, le ti verifikojnë edhe shërbimet mbështetëse të Ministrisë së Drejtësisë.

Teksa të gjithën e quan situatë të stisur dhe në prag zgjedhjesh, nënvizon se nuk mund të bëhet pjesë e gjyqeve popullore. ”Nuk kam ndërmend të bëj e as ti nënshtrohem gjyqeve popullore dhe elektronike. Aq më tepër për gjera të stisura”.

Postimi i plotë i Ylli Manjanit

Sapo u zgjova u njoha me lajme “bombastike” mbi disa arrestime zyrtarësh. Mendova për një çast se kush e di çoa ndodhur me çështjen e unazës së re apo ndonjë koncension apo blerje votash. Por jo! Ishin arrestuar disa zyrtarë dhe ish zyrtarë të Ministrisë së Drejtësisë. Ende nuk kuptoj nëse janë arrestuar, pra me vendim gjykate, apo shoqëruar e ndaluar nga policia.

Nuk më erdhi mirë sigurisht! Janë punonjës të asaj Ministrie dhe për aq kohë sa kam punuar me ta, ndjej keqardhje. Në disa lajme elektronike lexova se qenkam dhe unë bashkë me Petrit Vasilin në verifikim!

Unë nuk di asgjë për këtë fakt por nëse duan të verifikojnë apo hetojnë shumë mirë do bëjnë. Nëse ky pushtet ka mbaruar punë me trafikun e drogës, kanabizimin e vendit, koncensionet e PPP, tenderat e infrastrukturës dhe abuzimet miliona e eurove, le ti verifikojnë edhe shërbimet mbështetëse të Ministrisë së Drejtësisë. Biles edhe të kohës së sotme, se i njëjti personel është.

Unë nuk jam person me imunitet dhe as mbrohem nga parti apo njeri tjetër. Mendoj dhe shprehem lirisht për atë që mendoj, pavarësisht çmendojnë të tjerët. Për të gjithë të interesuarit, miq e gazetarë nuk kam asnjë koment më shumë për këtë çështje. Nuk kam ndërmend të bëj e as ti nënshtrohem gjyqeve popullore dhe elektronike. Aq më tepër për gjera të stisura.

Portaleve e mediave pro qeverisë, aq më pak lodhem ti sqaroj e tu jap ushqim që ata të vijojnë të vjellin kundër meje. Vijoj të mendoj e shprehem lirisht mbi ato që mendoj, pa i marrë leje askujt! Si gjithmonë!