Kreu i opozitës Lulzim Basha ka reaguar për situatën në të cilën ‘me urdhër nga lart’ u përpoqën që ta pengonin në takimin e tij me studentët.

Ishte bashkia e Tiranës që me një reagim qesharak mbrëmjen e djeshme, akuzoi kreun e PD-së se kishte hyrë pa leje në Qytetin Studenti, duke u përpjekur që të shkaktojë incident në mënyrë të kotë

Në lidhje me këtë situatë të paprecedentë ka reaguar sot edhe vetë kreu i PD-së dhe opozitës Lulzim Basha

‘Si shërbyes publik, nuk do të lejoj askënd që të më pengojë të dëgjoj problemet e bashkëqytetarëve të mi dhe të përpiqem t'i ndihmoj ata. Kjo është arsyeja pse u bëra pjesë e jetës publike’, shkruan Basha në Facebook.

Reagimi i plotë i kreut të PD-së, Lulzim Basha:

Ngjarjet e 24 orëve të kaluara janë një pamje e qartë e realitetit me të cilin përballet Shqipëria.

Mbrëmë ishim të ftuar nga disa studentë për të parë si jetojnë dhe për të dëgjuar shqetësimet e tyre.

Studentët tanë janë e ardhmja e këtij kombi, shqetësimet e tyre janë shqetësimet tona. Kjo është rruga jonë.

Rruga e të dëgjuarit, e përfaqësimit të vërtetë të të gjithë shqiptarëve.

Kur mbërritëm në godinë u takuam me një punonjëse të konviktit, e cila na kërkoi të largoheshim. Kjo porosi erdhi nga lart.

Në fakt kjo është rruga tjetër, ajo e frikësimit dhe intimidimit.

Si shërbyes publik, nuk do të lejoj askënd që të më pengojë të dëgjoj problemet e bashkëqytetarëve të mi dhe të përpiqem t'i ndihmoj ata. Kjo është arsyeja pse u bëra pjesë e jetës publike.

Unë u bëj thirrje atyre që merren me kërcënime dhe frikësime, të rishqyrtojnë taktikat e tyre. Populli shqiptar do të dëgjohet!