Kryeministri Edi Rama po zhvillon në Thumanë takim me banorët e prekur nga tërmeti i 26 nëntorit, ku ka paraqitur projektet dhe ka shpjeguar proceset e Rindërtimit.

Gjatë fjalës së tij, Rama ka thënë se, Thumana do të shndërrohet në një atraksion turistik, siç ka ndodhur me Pukën dhe Belshin.

“Përrallat e mia dalin, ka ndonjë që s’ka dalë, po se nuk i ka ardhur koha. Kur thoja që Puka do bëhet fshat turistik, pukjanët thonin “kur do ike ky palla i gjatë se boll na kanë pallur me rrena”. Shkoni në Pukë tani, në Belsh, po. Se këtu ka një liqen që është ngjitur me zonat e banuara. Dhe këtu ka një liqen, po ai është i shkëputur, po di që ai liqen aty është një arsye për të besuar se dhe Thumana do të bëhet një zonë ku njerëzit do thonë “Kush do vij në Thumanë për fundjavë”, tha ai.

Më pas fjalën e kanë marrë banorët, ndërsa një prejt tyre ka thënë se kishte dy shtëpi që i janë prishur dhe ka pyetur Kryeministrin se çfarë do të ndodhë me to.

“Edi Rama të lutem lëri përrallat se na ka ardhur shpirti në majë të hundës. Nëse kjo që thoni ju bëhet, atëherë është shumë mirë për ne. Në fakt jemi bërë pesimistë nga ajo që kemi parë. Se të shikosh fëmijën që lutet dhe mos bësh gjë, nuk e di”, tha banorja.

Pas saj, e mori fjalën Rama, i cili ndërkohë që fliste, zonja vazhdonte të shprehte shqetësimin e ssaj.

“Më myte, mos se më shkatërrove. Parimi është që ne do ndërtojmë shtëpitë e atyre që kanë humbur shtëpitë. Ke dy hyrje në një pallat që do prishet dhe do i marrësh siç i kishte“, iu përgjigj Kryeministri.