Kryetari i opozitës, Sali Berisha, e theksoi me forcë sot para mediave, rëndësinë që i kanë kushtuar pjesëmarrjes në Kuvend, në institucione dhe mosbojkotimit kurrë të tyre.
"Absolutisht! , -tha Berisha në përgjigje të pyetjes së një gazetari për këtë çështje - Një gjë ju siguroj ju dhe shqiptarëve, që çdo opsion, përfshi grevën e urisë, është 100 përqind i mundshëm. Ne nuk e dorëzojmë Kushtetutën. Ne nga parlamenti nuk largohemi, por në parlament do mbrojmë të drejtat kushtetuese të deputetit, që janë njëkohësisht të drejta kushtetuese të gjithë atyre që kanë votuar opozitën."
"Rama e ka shkatërruar institucionin themelor të demokracisë"
"Këto po i bën Edi Rama, - vijoi më tej kreu i PD.- Edi Rama të zbatojë Kushtetutën në parlament, të zbatojë rregulloren dhe të jeni të sigurt se edhe në këto kushte, të cilat ai i krijoi që ne të braktisim parlamentin, ne nuk po e braktisim. Ju e shihni. Ky qëndrim është një respekt që tregojmë ne për institucionin themelor të demokracisë së një vendi, të cilin e ka shkatërruar Edi Rama me përjashtimin e pluralizmit."
