Dy kompani, shumë pranë qeverisë së Edi Ramës, kanë ndarë fondin 50 milionë euro për ndërtimin e një pjesë të aksit rrugor “Elbasan-Qafë Thanë”. 

Kompania “2T” shpk, me aksioner kryesor Artan Sakon, vëllain e komandatit të Gardës, Gramoz Sako, është shpallur fituese në tenderin e zhvilluar nga Autoriteti Rrugor Shqiptar, “Zgjerimi i rrugës Elbasan - Qafë - Thanë (Faza III)”, me fond limit 23.6 milionë euro.

Ndërsa kompania “ANK”, e themeluar nga ish-deputeti socialist, Ndue Kola dhe tashmë e administruar nga familjarët e tij, është shpallur fituese e procedurës “Zgjerimi i rrugës Elbasan - Qafë - Thanë (Faza IV)”, me fond limit në të njëjtën vlerë, 23.6 milionë euro.

Rezultatet e tenderit janë publikuar në fund të kësaj jave. Referuar dokumentave zyrtarë krijohen disa pikëpyetje mbi mënyrën se si janë zhvilluar procedurat.

Në të dy tenderat kanë marrë pjesë nga 6 kompani, në të cilat gjysma prej tyre janë skualifikuar.

Në procedurën e parë, kompania “2T” shpk është shpallur fituese me ofertën 21.4 miliardë lekë të vjetra, ndërsa kompania “ANK” ka dalë humbëse, pasi ka paraqitur ofertën 22.8 miliardë lekë të vjetra.

Në procedurën e dytë, shoqëria e familjes Kola ka dhënë ofertën më të ulët, në shifrën afërsisht 21 miliardë lekë të vjetra. 

Ndërsa shoqëria “2T” ka rezultuar humbëse, pasi ka paraqitur ofertë më të lartë, në vlerën 22.8 miliardë lekë të vjetra, saktësisht aq sa ishte oferta humbëse e kompanisë “ANK” në tenderin e parë.

Deri më tani, Autoriteti Rrugor Shqiptar ka tenderuar 4 faza të zgjerimit të rrugës “Elbasan-Qafë Thanë”, duke vendosur në dispozicion të operatorëve ekonomikë në total një fond prej rreth 100 milionë euro, ndërkohë që ende nuk parashikohet se sa do të shkojë fatura përfundimtare.