Andi Bushati ka folur për sulmin brutal ndaj avokatit Sokol Mëngjesi, i cili është duke luftuar për jetën.
Bushati, i ftuar në emisionin ‘Të Paekspozuarit’ në MCN TV, hodhi dyshime për versionin e policisë, pra se sulmi ka qenë një konflikt mes avokatit dhe klientit për një çështje të lidhur me pronat, ndërkohë që nuk është hetuar pista tjetër, që avokati mund të jetë sulmuar edhe për shkak se është avokat i liderit të opozitës.
‘Unë dëgjova Floriana Garon dje dhe thashë këta po akuzojnë pa prova. Edhe në mendimin tim, nuk mund të thuash Edi Rama sepse nuk ke provë.
Tani, ne diskutojmë një çështje pronësie, që ka me dhjetëra, qindra, mijëra, por nuk duhet të harrojmë asnjë fakt. Ky zotëri që u masakrua, ishte edhe avokati i liderit të opozitës, në një proces farsë.
Çfarë thoshte sot Berisha? Dakord bënë një krim prone, pse në mes të Tiranës? Pse në një vend ku kishte kamera? Pse të pa maskuar? Pastaj kapet ai dhe thotë për prona e kam bërë.
Berisha donte të thoshte, që kjo është lojë e policisë, që ka shfrytëzuar një çështje pronësie. Pra, tani unë prapë nuk i besoj sepse nuk kanë dhënë fakte, as Saliu, as Argita dhe as Floriana, por këto pyetje, duhet ti japin përgjigje. Kjo policia që na ka nxjerrë Fred Alizotin, gënjeshtrat për votat në Elbasan, ka treguar që është e paskrupullt në manipulim, kur del Sali Berisha, duhet t’ju japë përgjigje këtyre pyetjeve. Mua nuk më duket krim profesionistësh, por amatorësh, që të mendojmë se ka ndodhur për çështje prone.
Edi Ramës nuk i prish punë, sepse e ka kopsitur gjyqin e Berishës me SPAK-un. Por, teoria e Edi Ramës sot është të frikësojë çdo njeri që tenton ta sfidojë.
Pasi goditet me grusht Berisha, masakrohet edhe avokati që e mbron Sali Bersihën, jemi në një gjë, që ej, ki kujdes, po sfidove naltmadhninë, mund të përfundosh edhe me levë.
Nëse ne bëjmë një shkrim kundër Sali Berishës dhe goditemi pastaj për çështje pronash, nuk ka asnjë polici serioze, që të mos hetojë edhe Sali Berishën për këtë çështje. Unë bindem që ja kam futur kot, sepse po them hipotezën e Berishës, por për sa kohë pyetjet, pse dolën zbuluar, pse në mes të Tiranës dhe pse dolën direkt për të thënë për cështje prone, pa marrë përgjigje këto pyetje kjo çështje nuk është e zbardhur. Këto pyetje, si ka mundësi që një njeri niset të bëjë krim dhe është kaq amator?’, tha ndër të tjera Bushati.
