Nga Boldnews.al

Gjimnazistët shqiptarë u renditën të fundit në botë në raportin ndërkombëtar të vlerësimit të kreativitetit(mendimit krijues), të hartuar pak ditë më parë nga Programi për Vlerëndimin Ndërkombëtar të Studentëve (PISA).

Ky rezultat skandaloz, nuk është aspak i papritur. Në dhjetor të vitit 2023, PISA konstatoi rënie drastike të aftësive të rinjve në shkollat e mesme në lëndët matematikë, letërsi dhe shkenca.

Gjithashtu, në Tetor të vitit të kaluar, universitetet shqiptare populluan fundin e listës së vlerësimit të “PISA”. Të gjithë të dhënat dëshmojnë se arsimi në Shqipëri është thuajse në një kolaps të plotë. 

Dështimi vjen nga politikat arsimore, por sidomos nga shpopullimi masiv. Të dhënat zyrtare të Ministrisë së Arsimit tregojnë se numri i maturantëve ra në 28 mijë nga 42.300 që ishin në vitin 2014, ose me rreth 34 përqind.

Statistikat e rënda në Arsim përfshijnë 3 mandatet qeverisëse të Edi Ramës, kryeministrit që konsiderohet gjerësisht si shkaktari i largimit masiv të mbi 500 mijë qytetarëve shqiptarë në dekadën e fundit, mes të cilëve edhe shumë fëmijë.

Nga ana tjetër, politikat arsimore qeveritare, të orientuara kryesisht në tenderat miliarda euro për laboratorëve që nuk shihen askund dhe infrastrukturë që vijon të jetë shumë larg standarteve të pranueshme për mësim-dhënie, kanë ndikuar drejtëpërdrejtë në situatën skandaloze të nivelit shkollor në vendin tonë.

Natyrisht, përgjegjësi kryesor ka një emër të përveçëm-Edi Rama, i cili erdhi në pushtet me “Rilindjen” e Arsimit dhe përfundoi me degdisjen e shkollës shqiptare në nivele të turpshme.

Në krah të tij, në radhën e dështuesve, janë Ministret e Arsimit, të cilat kanë mbajtur turpshëm këtë post, thjesht si figura dhe përcjellëse të imazhit të liderit të tyre.

Lindita Nikolla është ministrja më jetë-gjatë e “Rilindjes” së Edi Ramës.

“Zysh Linda” u emërua në atë detyrë në Shtator 2013. Të dhënat e publikuara në media nga eksperti Taulant Muka, treguan se ajo kishte qenë vetë një nxënëse skandaloze, pasi kishte mbaruar gjimnazin me mesataren 5.8.

Megjithatë, ky fakt nuk e pengoi që të qëndronte në detyrë e kreut të Arsimit, për më shumë se 5 vjet.

U largua për rreth dy muaj, në Maj-Qershor 2017, pas paktit mes Edi Ramës dhe Lulzim Bashës për “qeveri me bazë te gjërë”.

Lindita Nikolla u rikthye sërish në shtator të atij viti, deri në Dhjetor 2018, kur kryeministri Rama u detyrua ta largojë, pas protestave të aspirantëve për studentë, pas skandalit me “testimin e Turit”.

Besa Shahini u emërua në vendin e saj, në fund të Dhjetorit 2018. Besa, një nga prurjet “patriotike” të Edi Ramës, si përfaqësuese e Kosovës në qeverinë shqiptare, i ngjante më shumë një lloj pluhuri kozmik, që vjen rrotull kot dhe nuk bën asnjë punë.

Ashtu siç erdhi në krye të Ministrisë, ashtu edhe u largua në Shtator të vitit 2020. Ajo i dorëzoi një dorëheqje formale kryeministrit Edi Rama, pa dhënë asnjë lloj shpjegimi se përse e ndërmori këtë vendim dhe, për më tepër, pa u përballur asnjëherë me llogaridhënie për rrokullisjen që tashmë kishte marrë arsimi shqiptar.

“Pedagoge” Evis Kushi ishte pasuesja në krye të Arsimit Shqiptar, me vendimin e Ramës në Shtator 2020.

Për tre vjet në atë detyrë, Kushi u angazhua më shumë të grindej me opozitën se sa të hidhte sytë nga gjendja e arsimit. Nuk është aspak çudi që dështimi më i madh në sistemin arsimor dhe në renditjen globale përfshin periudhën kur Evis Kushi ka drejtuar Ministrinë e Arsimit.

Prej shtatorit 2023, në krye të kësaj Ministrie është Ogerta Manastirliu. Pa asnjë lidhje me sistemin arsimor, përveçse ka përfunduar studimet e larta, Manastirliu “u strehua” nga Rama në këtë ministri, pas skandaleve të rënda financiare, ku ajo e përfshiu veten si titullare e Ministrisë së Shëndetësisë.

Një seri e gjatë kallëzimesh janë dorëzuar në Prokurorinë e Posaçme nga opozita, por jo vetëm, për tenderat sekretë miliarda lekë të periudhës së pandemisë së Covid-19.

Nën këtë trysni të kallëzimeve penale, Manastirliu duket qartësisht se nuk është aspak e përqëndruar për zhvillimin e Arsimit, për më tepër që është edhe një fushë, ku ajo nuk e gjen veten askund.