Lideri i së djathtës shqiptare, Sali Berisha para mbështetësve të tij në ditën e 235 të arrestit politik u ndal sërish te trafiku i mbetjeve toksike, ku tha se Rama dhe intitucionet që ai urdhëron, kërkonin me çdo kusht që të përfshinin në aferën e transportit të lëndëve toksike, edhe Kosovën.

Sipas Berishës, Rama dhe Ministria e Mjedisit donin të përlyenin eksportin e mineraleve nga Kosova me eksportin e lëndëve helmuese, përmes falsifikimit të ndërrimit të kodeve.

Duke e cilësuar si aktin më të turpshëm, Berisha tha se  kjo tregon se përfaqësuesi i Edi Ramës është aty për të lejuar, për të falsifikuar, për të maskuar çdo lloj trafiku në Shqipëri.

Berisha: Të dashur miq!

Në këtë regjim e kërcënuar gjer në palcë nuk është vetëm gjendja ekonomike, nuk janë vetëm liritë dhe të drejtat. E kërcënuar gjer në palcë në këtë regjim është vetë jeta e shqiptarëve.

Në një vend ku 18% e fëmijëve nuk marrim dot më shumë se 1 apo 2 vakte në ditë, në atë vend ulërijnë sirenat e urisë, sirenat e skamjes.

Natyrisht për ata që kanë veshë dhe i dëgjojnë, për ata që kanë zemër, kanë ndjenja, por jo për shushunjat, jo për qeveritarët për të cilët qytetarët nuk ekzistojnë, për të cilët jeta e tyre nuk ka vlerë.

Debat i madh, diskutime, artikuj në Shqipëri dhe në botë për kontrabandën, për trafikun e lëndëve helmuese, eksportin e tyre nga Shqipëria.

Para katër ditësh, ministria e Mjedisit mashtroi shqiptarët se ata nuk kishin dhënë autorizim, rezulton se ajo ministre e antimjedisit për të cilën jeta e qytetarëve nuk ka ndonjë vlerë, kishte dhënë me vulë dhe me firmë, licencën dhe autorizimin.

Por përsëri, ju them, akti më i paimagjinueshëm ishtë ndërrimi i kodeve nga lëndë helmuese, në lëndë jo helmuese. Nga lëndë të rrezikshme në lëndë të parrezikshme.

Nuk ka akt më kriminal se ky. Kjo tregon se përfaqësuesi i Edi Ramës është aty për të lejuar, për të falsifikuar, për të maskuar, çdo lloj trafiku në Shqipëri.

Miqtë e mi!

Diabolik dhe antishqiptar, ç’njerëzor dhe të pamëshirë, donin të përlyenin eksportin e mineraleve nga Kosova me eksportin e lëndëve helmuese, të fshehura me etiketë si jo helmuese, nga mafia qeveritare shqiptare.