Presidenti i Turqisë, Rexhep Taip Erdogan ka bërë një deklaratë të fortë ditën e sotme lidhur me Shqipërinë.

Duke folur para studentëve të huaj, të cilët studiojnë në Turqi, Presidenti i vendit Rexhep Taip Erdogan u shpreh se dita-ditës vendi po bëhej gjithnjë e më i fuqishëm, ndërsa nuk ka hezituar për të ndërhyrë edhe në punën e brendshme të Shqipërisë.

‘Sigurisht, ne vazhdojmë bisedimet. Herët a vonë ne do ta shkatërrojmë këtë lëvizje. Çdo ditë ne avancojmë, Fondacioni ynë Maarif në Shqipëri vazhdon procesin e marrjes së kontrollit ndaj institucioneve të atjeshme arsimore’, shtoi ai.

Duke folur për studentët nga jashtë, të cilët shkollohen në universitetet në Turqi, Erdogan tha se në vend janë aktualisht 115 mijë studentë të huaj, ndërsa objektivi është që numri i tyre të arrijë në 350 mijë.

Kjo sepse, sipas Erdogan, Turqia duhet të jetë mes pesë vendeve që kanë më shumë studentë të huaj. Ai shtoi se janë marrë masat e nevojshme parandaluese që nga pranimi i studentëve, procesit të studiuarit, dhe deri në diplomimin e tyre, studentët të mos shfrytëzohen nga organizatat terroriste FETO, e cila, siç tha ai, është armik i islamit dhe Turqisë.

Duke iu referuar vendit tonë, Presidenti turk tha se Shqipëria për fat të keq është nën një lloj të pushtimit të organizatës terroriste FETO, por megjithatë ai tha se po vazhdohej procesi për të shkatërruar këtë lëvizje.

Edhe pse Shqipëria është një vend i pavarur, duke se miqësia mes Edi Ramës dhe Erdoganit, i ka dhënë këtij të fundit guximin për të komentuar dhe ndërhyrë në punët e Shqipërisë.